منتديات البوابة - كان لي صاحب

كان لي صاحب..
من بقيت زمن الغباوة و المتاعب..
من بقيت (الحلم) أو باقي المقالب..
كل حاجة قالتلي إنّه ما يستاهلش..
غدر.. هجر.. و ألف حاجة ما تتقبلش..
بس كان عندي أمل..
إن (المثل) ما ينطبِقش..
و (يِتْعِدِِلْ من غير قوالِب) !

كان لي صاحب..
غاب و عاد.. و غاب و عاد.. و غاب
بس ما اختلفش قربه عن الغياب
كل أيامنا سوا كانت (حروف)
و اما يحتاجني.. ساعتها لازم يشوف
كل (فعل) و (اسم) جنبه..
مهما هتكون (الظروف)..
و اما اعوزه خيره ناضب

كان لي صاحب..
كان فيه ناس غالية معاه.. و مالوهش غالي
و اللي جاله بجرح.. راح بجراح ليالي
طبعه مِتْقَلِّب و مِتْعَكَّر و عاصف
و اما يتزلزل يهد اللي يصادف
و اما يهدى.. غروره يقوى
عمره لحظة ما يبقى آسف
فوق سنين العشرة شاطِب

كان لي صاحب..
لما فاض بيَّ اللي شايله منه سبته
و اما لاموا اني ما صنتش بعده غيبته
قلت انا باحكي على اللي الكل شافه
بس عندي اللي ما حدش غيري شافه
إنما غلطي كان أكبر..
و الكلام ده فْـ صفُّه و لإنصافه..
ان انا اللي اخترته صاحب