[الملاك]

بسم لله الرحمن الرحيم





يا مرحبا..يا مرحبا...زارتنا البركه..اش هالخطى السعيد..ايا تفضلو زوزو للسقيفه و سبقو ليمين

حوته و خمسه و قرن غزال.... عشانا بالحوت الليلا مش هكا يا لبنات؟

خمسه و خميس...حاضر محمد و غايب ابليس..شق و داد فعيون الحساد

عسلامتكم و مرحبا بيكم ولاد و بنات بلادنا لعزيزه على قلوبنا الكل




الساعه .. و قبل كل شيء حليييو بالمقروض ...كل حد يدخل ياخو كعيبا " اي نتشحح كعيبا برك ههههه " و كويسو بالتاي " شنوا تلوجو عالتاي؟؟ ما حطيتوش..يزيو مالبخل و سخنو كويس على رواحكم p: " و يقرى هالسطرين باش يعرف شنوا هدفنا من هالموضوع : )




.+. تــــــــــ و ــنــس .+.




من شمالها لجنوبها كلنا عاشقين ترابها العزيز....و حبها فالقلب ما يوفاش



وخياني و وخياتي جاتني هالفكره الحلوه و الي نشالله تعجبكم و هيا لم شمل التوانسى الي فالمندى باش نتعرفو على بعضنا اكثر و نحكيو فالي يخصنا و نعرفو راسنا من ساسنا و نكونو كلنا على علم بلي صاير مع غيرنا من وخيان في مختلف المواضيع ولا حتى في الحيات العاديه ..

لذا الهدف الاساسي هوا :

+ لم شمل التوانسى التحافن وهكاكا نتعرفوا اكثر على بعضنا

+ خلق جو تونسي حر " ماكم تعرفو كيف جونا ما فماش و ما يخلقش في حتى بلاصا

+ الافاده قدر المستطاع " كل قدير و قدرو "

+ باش نكونو ديما على علم بكل جديد و يخص اي عضو تونسي

+ في حالة واحد منا حاشتو باي حاجه يطلبها من عند ولاد بلادو قبل كل شيء " ماكم تعرفو : الماء الي ماشيء للسدره زيتونتنا اولى بيه "

+ مساندة اي تونسي وقت اللازم " ماكم تعرفو زادا : كثرت العموما فالايام المشوما " و الايام المشوما قربو برشاااا ههههههه

+باش اناقشو امور تهم بلادنا و نتحدثو علي يساعدنا و يهمنا و نعملو حوارات نافعه و نطيرو القلق وقتلي فما قلق ههههااااا

بالطبيعه كل الي تحبو نحكيو عليه نحكيو << حنبعل باش تشكي بينا ... برنامج فرغ قلبك باش نطيحو عليه ههههه

خاصه و انو برشا منا عايشين فالخارج و اكيد كلنا نستاحشو حتى لاي كلمة تتقال بالتونسي و تهم تونس

نشالله يكون فما تفاعل تحفون كيفكم يا تحافن و نشالله نشوفو عدد باهي مالتوانسه هنا خاتر بالحق ماذابينا اعدادنا تكبار

ايا نوروني فالموضوع الي هوا موضوع كل تونسي "ما نحبش حد يقلي موضوعك " خاتركم كيف نقطة العسل على قلبي و فرحانا بيكم و الي نحبو ليا نحبو ليكم